Am vergangene Fritig an unserer Blauboys Binnige MVV isch mitem Roli e ganz bsunderi Person gheehrt worde. Unsere Roli isch mitere Standing Ovation unsere Ehrepräsi worde. Als Mister HB^4 isch im Septämber 58 gebore, isch im April 1972 für dr TV Binnige lizenziert worde und sit unzählige Johr immer engagiert. Dr Roli het im Verein praktisch jedi Funktion scho inne ka, het für dBlau Boys langjöhrig Schiedsrichter gmacht, het im Vorstand über Johrzähnte tolli Arbet gleischtet und het dä Vorstand au als Präsident über Johre gfiehrt. Er isch e legendäri Katz im Goal, das isch immerno dr Fall, die meischte vo euch wüsse das us eigener Erfahrig und weiss us Binnige immer die aktuellschte Grücht. Mittlerwile sorgt er immer wieder für Ordnig in dr Halle, luegt dass sie immer glänzt und isch unsere beschte Vereinsambassador. Mir möchte em Roli nomol unsere härzliche Dangg usspreche. Härzlichi Gratulation!
